Константин Никодимович Драчевский

Чалавек, які актыўна змагаўся з фашыстамі, абараняў нашу зямлю, змагар за лепшую долю, адданы працаўнік вёскі.
Канстанцін Нікадзімавіч Драчэўскі нарадзіўся ў 1915 годзе. Скончыў школу ў вёсцы Скароднае, дзе затым вывучыўся за шаўца. Да вайны працаваў кінамеханікам і загадчыкам сельскага клуба ў гэтай жа вёсцы. Пайшоў у армію (прыкладна ў верасні 1939 года), вярнуўшыся, доўга дома не пабыў: як радыст, быў запатрабаваны на савецка-фінскай вайне. Ваяваў там у коннай кавалерыі. Прыйшоўшы адно пекла, апынуўся ў другім…
З першых дзён вайны знаходзіўся ў саставе аднаго са знішчальных батальёнаў. Яны ахоўвалі масты і іншыя важныя аб’екты, сачылі за тым, каб на тэрыторыю раёна не прабраліся варожыя парашутысты. Так, неўзабаве пасля акупацыі раёна, стаў байцом Скараднянскага партызанскага атрада. Вось што ўспамінае З. Я. Чарнаглаз у сваёй кнізе: «У атрадзе Косця быў незаменным, вельмі каштоўным спецыялістам, адважным партызанам, якога не заўсёды ўдавалася ўгаварыць не ісці на якое-небудзь баявое заданне». Ён шмат разоў прыводзіў «языкоў», пераапранаўся ў нямецкую форму і рабіўся «сваім сярод чужых».
У сямейным архіве захоўваюцца дакументы, якія расказваюць аб ваенных подзвігах Канстанціна Нікадзімавіча Драчэўскага, аб яго ўзнагародах: ордэн Чырвонай Зоркі, ордэн Чырвонага Сцяга, ордэн Айчыннай вайны ІІ ступені, медаль «За перамогу над Германіяй».